5 қазанда Теңізде өндірістік сенімділік пен тиімділік мәселелеріне арналған көшпелі Operations Reliability & Performance Review техникалық жиыны өтті. Оған «ҚазМұнайГаз» ҰК АҚ Ірі жобалар департаментінің директоры Жандос Жылқайдаров, Chevron Eurasia вице-президенті Дилан Морган және ТШО басшылығы қатысты.

Кездесуде өндірістік көрсеткіштер, өндіріс тиімділігі, техникалық қызмет көрсетудің басым бағыттары, сондай-ақ Теңіздегі өндірістік қызметтің қауіпсіздігі мен сенімділігін одан әрі арттыру мүмкіндіктері талқыланды.

Техникалық сессиялар барысында ТШО Теңіздегі өндірістік нысандардың қауіпсіз әрі сенімді жұмысын қамтамасыз етуге бағытталған қолданыстағы бастамалар мен тәсілдерді таныстырды.

Қатысушылар сондай-ақ алдағы уақытта назар аударуды және жетілдіруді қажет ететін бағыттар бойынша техникалық пікір алмасты.

Кездесу қорытындысында тараптар Теңіздегі қауіпсіз, сенімді әрі тиімді өндірістік қызметті қамтамасыз ету үшін техникалық ынтымақтастықты жалғастырудың, инновациялық шешімдерді енгізудің және үздіксіз жетілдірудің маңыздылығын атап өтті.